Музейга сәяхәт

Класс җитәкчебез Силүзә апаның : “Балалар, музейга экскурсиягә барасыгыз киләме?” дигән соравына хор белән: “Әйе, ур-ра!”- дип җавап бирдек.Машиналарны укытучы апалар алдан ук белешеп куйдылар һәм, дәресләрдән соң Мөслимгә кузгалдык.Юл буе алтын көзнең табигатенә сокланып, агачларның матурлыгына  хозурланып бардык.

   Район үзәгендә бүген җәяүлеләр өчен тротуарлар салына, урам юллары төзекләнә.Бер үк вакытта бик күп биналарны яңарту эшләре бара.Туган якны өйрәнү музее да яңа гына реконструкцияләнгән ике катлы бинада урын алган. Музейның алты күргәзмә залы бар икән.Археологик эзләнүләр белән шөгыльләнү, балалар белән түгәрәкләр  уздыру өчен класс кабинетлар ясалган. Безнең өчен  иң кызыклы экспонатлардан Мөслим районы җирлегеннән табылган мамонт һәм мөгезборын сөякләре булды. Күргәзмәләр залындагы шәмаил һәм туграларны да зур кызыксыну белән күзәттек. Авылдашыбыз Роза апа Низамованың мәдәният йортында оештырылган  күз явын алырлык картиналар күргәзмәсен зур соклану белән карадык.

    Бинаның фасады да узып баручыларны үзенә җәлеп итәрлек. Музей диварлары төннәрен  хәтта ут белән яктыртыла.

("Авыл утлары" район газетасы, 3 нче октябрь,2014)

Алия Гыйздәтуллина,

Әмәкәй урта мәктәбенең 7 нче класс укучысы.